Kom heim úr vinnunni og inni í stofu sat Agnese lettneski leigjandinn okkar á spjalli með Mike frá Austurríki og Mika frá Finnlandi. Hlustandi á Mugison.

Þau voru að tala um það þegar Mike rakaði af sér öll líkamshár og um spænska gaurinn sem er ástfangin af honum.

Vantar bara hassið og ódýra bjórinn þá væri þetta peeerfect!

ps. Ökukennarinn minn er víst dæmdur kynferðisafbrotamaður.

Jamm við erum komin með nýjan leigjanda. Hún heitir Agnese og er skiptinemi frá Lettlandi. Og við erum jafnvel kannski komin með annan leigjanda frá Austurríki þannig að Hjallalundur 5F virðist vera að breytast í einhverskonar kommúnu. Ekkert að því svosum.
Helgin var ákaflega skemmtileg hjá mér, tveggja daga gamalt uppvask frá þorrablótinu á Egilsstöðum var tekið með trompi á sunnudag. Æði. En það besta var það þegar 16 ára litli bróðir minn sem er nýhættur á pela ákvað að detta í það á þorrablótinu á Reykhólum. En ekki án þess að fá leyfi frá mömmu fyrst. Einhverskonar hefð sem hefur myndast hjá okkur systkinunum, að biðja mömmu um leyfi þegar farið er á fyrsta fylleríið. Við fengum líka ákaflega biblíulegt uppeldi.

En eitt er ekki alveg að virka. Nú er kominn meira en mánuður síðan ég fékk minn síðasta bjór og mér er bara alveg hætt að lítast á blikuna. Er ég að þorna upp? Hvað er að gerast? Ég verð eiginlega að lýsa eftir djammi næstu helgi því eitthvað verður að gera í málunum áður en illa fer. Nú er ég farin að vera allt of dugleg í ræktinni, heilbrigt matarræði líka. Þetta bara gengur ekki svona endalaust.

Hvað segið þið. Innflutningspartý?

ps. Trees með Marty Casey er uppáhalds lagið mitt í augnarblikinu. Mæli tvímælalaust með því, það er ógeðslega flott. Þið sem fylgdust með rockstar INXS vitið hvað ég meina.

Uhuhuhu.... ég er bitur, ein, einmana. Það er svo tómt og hljóðlegt í Hjallalundinum að það bergmálar í íbúðinni.

Þessi helgi átti að fara í suddalegt Þorrablót á Reykhólum. Hitta elsku Sollu og Betu en NEI. Því að helvítis fokkin hálfvitinn hann Valli gat ekki staðið við gefið loforð og unnið fyrir mig um helgina. Ef það er eitthvað sem ég þoli ekki þá er það fólk sem stendur ekki við orð sín. Og ég sem er búin að vinna næstum því hvern einasta dag í þessum mánuði þarf að vinna alla helgina. Æðislegt. Þetta væri svo sem alveg þolanlegt ef ég væri ekki komin með svona ógeðslega mikið ógeð á uppvaski. Það er leiðinlegt, leiðinlegt, leiðinlegt og ég er ógeðslega bitur uppvaskari.

Og þess vegna er ég að væla í ykkur lesendur. Væli væl væl.... Baldur er í borginni svo ekki get ég vælt í honum.

Vinna klukkan 12 á morgun og núna bölva ég þorrablótum því að í staðin að fá að sækja slíkar skemmtanir fæ ég að vaska upp eftir þær. Fokkin kaldhæðni.

ps. lofa minni biturleika næst þegar ég skrifa hér

Æi ég veit ekki. Ég veit ekki neitt. Hef bara ekki græna glóru. Þjáist af svo miklum valkvíða þessa dagana að hausinn á mér er að springa. Græn eða rauð vínber? Í hvaða sófa á ég að sitja? Þáttur á Skjá einum eða bíómynd á rúv? Video eða bíó? Ræktin kl. 10 eða 12?
Litlar ákvarðanir og gjörsamlega ómerkilegari en allt annað en ég bara hef ekki glóru hvað ég vil. Reyndar tengist þetta aðallega svona framtíðinni. Áðan fór ég að hugsa hvað það væri notarlegt að kaupa íbúð með Baldri svo við gætum haft notarlegt í kringum okkur. Ekki þrjár tegundir af sófum, auðir hvítir veggir og grænar eldhúsinnréttingar.
En svo fór ég að hugsa að ég er of ung fyrir svoleiðis. Ég ætti að vera að ferðast um heiminn og njóta lífsins.
Svo fer ég að pæla í námi. Ég var að horfa á Law and order og þá langaði mig sjúklega til að vera rannsóknarlögregla eða lögmaður. En svo horfði ég á House og langaði allt í einu að verða læknir eða sjúkraþjálfari. Sex and the city og mig langar til að vera drusla..
Hvað í anskotanum er eiginlega að mér?? Og svo til að toppa þetta þá virðast ALLIR vera að spyrja mig um framtíðarplön. En ég hef engin fokking framtíðarplön!
Látið mig í friði. Ég er uppvaskari, einhverntíma verð ég þjónn en meira veit ég ekki. Ég veit ekki einu sinni hvar ég verð í sumar.

En hvað á maður að gera. Láta hlutina bara gerast eða fríka yfir þeim?
Mig langar aldrei til að verða fullorðin.

Ég er uppvaskari!!

Er það kaldhæðni dauðans eða bara ógeðslega sorglegt?

ps. Baldur ætlar kannski að slá þang. Við erum gott par.

Bara örstutt um þetta mál. Ég hef ekki lesið greinina enda aldrei lagt í vana minn að lesa þetta sorprit og ætla mér aldrei nokkurntíma að byrja á því. En ég hef heyrt hvernig fyrirsögnin hljómar. Eitthvað um einhentan kennara á Ísafirði sem er ásakaður um barnamisnotkun.

Hverjir halda ritstjórar DV að þeir séu eiginlega? Það lá engin kæra fyrir í málinu eða neitt en DV ákveður að fella dóm yfir þessum manni sjálfir. Kemur í ljós að þetta er dauðadómur. Það getur vel verið að maðurinn hafi verið barnaníðingur en manneskja er saklaus uns sekt hennar hefur verið sönnuð. Þau orð hafa litla merkingu fyrir fréttamönnum DV.

Ég veit ekki hvort þetta sé afleiðing lélegs réttakerfis á Íslandi en mér líst lítið á að DV sé að taka lögin í sínar eigin hendur. Þetta er komið algerlega úr böndunum og ég tek undir með öllum þeim sem leggja til að fólk segi upp áskriftum sínum og hætti að kaupa þetta rusl.

Æh.. ég er latur bloggari og hef eiginlega ekkert að segja.
En ég er duglegur uppvaskari, ójá. Í dag er nefninlega fyrsti frídagurinn minn síðan ég kom á Akureyri og mér líður anskoti furðulega að þurfa ekki að vinna í dag. Ég er nefninlega orðin svolítið stjórnsöm á vaskann þar sem ég hef ráðið yfir honum síðustu 7 daga og líður illa að hleypa öðrum yfir á mitt yfirráðarsvæði. Það var líka allt orðið svo fínt og flott hjá mér því það hefur verið mjög lítið að gera og því allt tekið í gegn í eldhúsinu. Kokkarnir voru farnir að bera eldavélarnar niður í kjötvinnslu til að smúla þær með heitu vatni og svo voru þeir líka farnir að mála.

En já svo verð ég að segja frá þeim skemmtilegu fréttum að ég fjárfesti í líkamsræktarkorti á dögunum upp í Bjargi svo nú þarf að taka hressilega á því. Ég er búin að reyna sannfæra mig í allan dag að það sé skemmtilegt í ræktinni. En það er fokkin ömurlegt að byrja í ræktinni, sérstaklega eftir jólanammikökufylleríið. Ég hef nákvæmlega ekki neitt úthald, var gjörsamlega búin á því eftir 5 mínútur á hlaupabrettinu fyrsta daginn, gafst upp og fór heim. Vill einhver lána mér úthald og viljastyrk?
Eina mótívið sem ég hef núna er að ég er að fara til Mallorca þann 25. maí og mig langar ekki að vera einhver fituklessa í spikiníi á ströndinni. Nei takk. Svo þessi fokkin aukakíló skulu fá að fjúka. Svo væri það æðislegt líka að endurheimta fataskápinn.

En það versta við að æfa í Bjargi er það að ég er þá alltaf að rekast á frjálsíþróttakrakkana þar og fæ þá alltaf þennan samviskusting í magann. Ó já ég man þá tíð þegar ég stefndi á ólympíuleikana 16 ára, ætlaði að taka heiminn með trompi en hætti út af einhverjum einum ömurlegum þjálfara hjá FH.
En æi, getur maður verið að velta sér upp úr því endalaust? Uss... ég ætla að drulla mér í ræktina og endilega kæru lesendur, verið dugleg að sparka í rassgatið á mér.

Kveðja, íþróttaálfurinn

Já fyrst ég er að auglýsa eftir leigjendum er best að lýsa höllinni svona örlítið. Þetta er svona held ég u.þ.b. 90-95 fm íbúð. Stór og fín stofa uppfull af eins mismunandi og ósamstæðum húsgögnum og mögulegt er. Skemmtilegur "fátækir námsmenn" bragur af því. Eldhúsið er stórt og flott og inni í því er glæsilegt matarborð úr gleri sem er ekki enn dottið í sundur en einn stóllinn hefur hreinlega gefist upp á feitum rössum eigendanna. Já og eldhúsinnréttingin er græn. Ekki fallega græn heldur neongræn, en það venst reyndar alveg furðufljótt. Baðherbergið er ekkert svakalega stórt því það er troðfullt af skápum (sem er fínt) og við höfum baðkar sem má nota sem sturtu. Sniðugt. Þau tvö herbergi sem í boði eru ekki nein risaherbergi en alveg hinar ágætustu vistaverur og með stórum fataskápum.

En svo er skemmtilegt að segja frá tækjum sem eru hér til afnota. Það er sjónvarp sem kallast Vista og er alveg hið fínasta sjónvarp. Ekki eins og það gamla sem leifði manni ekki að ráða hvaða stöð maður horfði á. Svo höfum við DVD og video en toppurinn er að sjálfsögðu sú staðreynd að við erum með Skjáinn. Allar þessar 60 gjörsamlega tilgangslausu stöðvar, friends á frönsku og animal planet til að nefna einhver dæmi. Og svo má ekki gleyma ENSKA boltanum.

Í eldhúsinu er örbylgjuofn og ísskápur og á baðherberginu er þvottavél.

Ef þú hefur ennþá áhuga á að flytja inn til okkar Baldurs þá er símanr mitt efst á síðunni. Takk og bæ.